Þórsmörkin

Fór í dagsferð í Þórsmörk með Auði í dag. Tókum rútu á BSÍ klukkan 8. Skiptum um rútu og bílstjóra á Hvolsvelli. Stoppuðum við Seljalandsfoss og við Gígjökul. Fáránleg breyting á einum stað. Keyrðum fram á jeppa sem hafði brotið undan sér í einum læknum á leiðinni inn. Krossá rosalega leiðinleg. Morgunferðin úr Húsadal hafði víst verið skelfileg. En grafan var búin að vera að laga síðan og vörubíll að finna góð vöð. Fórum yfir í fylgd með vörubílnum.
Skiptum um bíl og bílstjóra í Húsadal og fórum inn í Bása. Þar tók Ingi á móti okkur og tveir flugbjörgunarstrákar sem eru þarna við gæslu. Okkur fannst við komnar heim þegar við komum í Bása - tala nú ekki um þegar maður kannast við skálavörðinn. Borðuðum og vöppuðum blómum skrýddan Litla Básahring. Fáir á tjaldstæðinu. Vorum svo keyrðar yfir í Langadal og skokkuðum yfir í Húsadal og vorum þar á sama tíma og rútan. Fréttum af jeppa sem hafði farið á flot í Krossá og stórskemmst. En en enginn skaði á fólki.
Mættum nokkrum bílum á leiðinni inn í Mörk og bíllinn sem hafði verið stopp í miðjum læknum var kominn upp á bakkann og búið að rífa undan honum vinstra framhjólið. Frábær dagur og minnir mann á að það er nauðsynlegt að heimsækja Þórsmörk reglulega. Við vorum einu íslendingarnir í rútunni og fengum prinsessumeðhöndlun af bílstjórnum. Já - og Ingi spurði hverkonar vitleysa þetta væri eiginlega að koma svona og fara heim á laugardagssíðdegi - og það fyrstu helgina í júlí! :) Veðrið var frábært, mest þurrt þar sem við vorum en smávæta síðasta spölinn í Húsadal. En greinileg hellidemba skammt frá.

Öðruvísi kvennakrimmi

Hólmfríður í bókasafninu rétti mér um daginn nýlega bók, Stelpurnar mínar eftir Susanne Staun. Þekkti ekki nafnið - og þótti byrjunin skrýtin - en - bráðfyndin og skemmtileg bók. Konan skrifar um Fanny Fiske og vinkonur hennar sem eru stórskrýtnar og skemmtilegar og leysa glæpamál á óhefðbundinn hátt. Ætla að kanna hvort ekki finnist fleiri bækur um hana á söfnunum hérna.

Bílamál og bókhald

Var að dunda mér við heimilisbókhaldið í kvöld. Eyddi meira í júní en aðra mánuði. En það var svosem ástæða fyrir því. Lét tékka á bremsunum í Litla Rauð og það var skipt um bremsuborða og diskana líka. Ágætt að muna að slíkt var gert í júní 2010.
Og svo sá ég Skugga minn í gær við bókasafnið. Það er svo fyndið - ég þekki hann hann á löngu færi. Hann er farinn að rygða svolítið blessaður - en alltaf jafn státinn. - Það mætti þó alveg bóna hann.

Dekur á Suðurlandi

Tók helgardekur á Suðurlandi í gær. Hitti Kötu í Hveragerði og vappaði um blómabæinn. Dásamlegt veður, þó það væri mikil aska í lofti, og hellingur af fólki á ferli. Skoðaði triljón sölubása og sá margt fallegt, prufaði m.a. gríðarþægilegan nuddpúða. Fórum á Selfoss. Keyptum núðlur á ágætum veitingatað og fórum með heim til Kötu þar sem ég vingaðist við köttinn hennar sem ég hafði ekki hitt fyrr. Kíktum á fornbílana á tjaldstæðinu. Margir fínir en vantaði uppáhaldsbílinn minn. Fórum svo á Eyrarbakka á jónsmessubálið í fjörunni. Þar var líka gríðarmikið af fólki.
Á sunnudag mættum við á Heilsustofnun NFLÍ - ég hafði fengið gjafakort í sund og tvo fyrir einn í mat. Hittum Eddu sem er á hælinu - og svo kom það fyndna sem sýnir fram að það borgar sig fyrir mig að skrásetja allt. Sundgleraugun mín eru ónýt - ég mundi ég henti þeim nýlega - í innilaug með söltu vatni. Og þar sem ég synti í söltu vatni í dásamlegu útilauginni á Heilsuhælinu - þá braut ég heilann um hvar ég hefði nýlega verið í söltu vatni. Og mundi ekki - mundi ég hafði verið með Auði - og í innlaug. Það var ekki fyrr en hálftíma seinna sem það rifjaðist upp yfir mér að það hefði verið í Vestmannaeyjum og ekki fyrir löngu síðan! Í hádeginu borðuðum við rosagóð eggaldin með steiktum kartöflum og sætum kartöflum og helling af öðru grænmeti. Vöppuðum um bæinn, hitti gamla rope yoga vinkonu sem var í gifsi, - og keypti púðann. Settum svo punktinn yfir i-ið með að fá okkur te og köku á hælinu.
Skutlaði Kötu heim og keyrði svo í halarófu heim í Kópó. Held röðin hafi verið nokkuð samfelld frá Grímsnesafleggjara og í bæinn. En gekk alveg þokkalega jafnt.

Austurland í blíðskaparveðri

Fór niður í Hróarstungur með Guðrúnu og Pétri á sunnudag. Skoðaði fallega kirkju og fann gamlan traktor sem ég varð að máta.

handbók Epiktets

Heyrði einhverntíman minnst á bók - handbók Epiktets sem dr. Broddi Jóhannesson þýddi, skrifaði það hjá mér og fann svo bókina á bókasafninu um daginn. Hún heitir "Hver er sinnar gæfu smiður" er er vel þess virði að glugga í. Þar segir m.a. í kafla 5.
"Ekki eru það atburðirnir sjálfir, sem áhyggjunum valda, heldur horf manna við þeim. Dauðinn er t.d. ekki skelfilegur, ella hefði hann einnig komið Sókratesi þannig fyrir sjónir. Skelfileg er einungis sú skoðun, að dauðinn sé skelfilegur. Ef eitthvað hamlar oss, þá skyldum vér engan annan sakfella en oss sjálf, þ.e.a.s. viðhorf sjálfra vorra. Vanþroska maður þekkist af því, að hann sakar aðra um, ef honum farnast miður. Sá sem áfellist sjálfan sig, er kominn nokkuð áleiðis, en sannmenntaður maður ber hvorki sjálfan sig né aðra sökum."
Mikið af gullkornum í þessari bók og á góðri íslensku :)

Bókmennta- og kartöflubökufélagið

Datt yfir þessa bók á bókasafninu í síðustu viku. Byrjað að lesa hana í gær og kláraði í morgun. Mæli með henni. Hún er verulega skemmtileg - en ég táraðist líka yfir henni. Langt síðan það hefur gerst.
Er öll að braggast - ætla út í stuttan labbitúr í sólskininu. Er með 30 daga áskorun fyrir sjálfa mig. Labba í hálftíma á dag og hugleiða í 25 mínútur. Þetta verður fyrsti í labbi - og annar í hugleiðslu.

Difficult tasks ahead.

Tékkaði á tarotinu á Fésinu í dag og fékk þetta lesningu - lagði ekki í að setja hana inn þar - en fannst óvitlaust að geyma hana hér - svona til að muna:

Recent Past
Strength
Strength and fortitude. From energy follows thought and action. Power that is respected. Quiet control of oneself and others. Need to bring strength from deep within and continue on in face of adversity. Strength of mind as well as body is needed. Difficult tasks ahead. Focus on all goals at once. Control of all resources at one's disposal. Ability to do what is needed when time is right. Knowing oneself and one's gifts as well as one's weaknesses.


Current Situation
Queen of Cups Reversed
A woman who has been hurt in love. Fear of deep feelings of commitment and attachment. An emotionally immature woman. A woman who prefers to remain alone without encumbrances of a relationship. Desire to set out on a different course without romantic attachment. Deep feelings of love not possible at the present time. Selfishness. Abandonment. A deep hurt from a past relationship.

Future Influences
The Star
Hope and inspiration. Realization of dreams and goals possible now. Whatever venture you are involved with, your lucky stars are with you. Positive energies flowing freely into your life. Make the most of the now. Heavenly influences surrounding you. Blessings are flowing freely like water. Abundance and spirit present. Bright promises. The presence of the Holy Spirit is with you. A good time to begin a new project or new relationship as it has carries blessing with it.

Lasin og leiðist rosalega

Einhversstaðar sá ég um daginn að það væri hollt að leiðast. Ég reyni að hugga mig við það. Þriðji dagurinn sem ég er inni og ekki séð hræðu. Takmarkað sem maður getur dundað sér við - og sjónvarpið - já - við skulum ekki minnast á þá hörmung. Ekkert gaman að vera lasin - og vanta hæfilega afþreyingu.

Lasin heima og spennandi símtöl

Lasin í dag, hósta harka og á voða bágt. Sérstaklega af því að bakið á mér bilaði í einu hóstakastinu í gær. Ótrúlegt afrek.
Fékk símtal í morgun að austan um að mér væri boðin staðan og fimm mínútum eftir það samtal hrindi síminn aftur og mér boðið að koma í atvinnuviðtal - á öðrum stað. Skemmtilegt - annað hvort í ökla eða eyra.
Móðir mín hefði átt afmæli í dag og Siggi vinur minn í Bergen á líka þennan dag. Best að demba sér í að senda honum tölvupóst. Fyrst ég sit svona við tölvuna.

Flögrað heim

Slapp heim í gær. Fékk nokkur sms um morguninn (fyrir klukkan 7) um að athugað yrði með flug seinna sama dag. Gleðitíðindin fékk ég rúmlega 10 um það að ég mætti mæta út á flugvöll klukkan 13. Tvær vélar lentu upp úr 13.30 og ég fékk far með annarri sem fór í loftið kl. 14. Flugið var fínt, gott skyggni. Sá gosmökkimn vel þó ég sæti við gangveginn. Jafnfallegt veður í Rvk og á Egilsstöðum en verulega mun hlýrra ...
Fór í morgun á ráðstefnu í Salnum "Láttu ekki þitt eftir liggja", þar var fjallað um skýrsluna og skjalastjórn. Fín ráðstefna.
Er hundkvefuð og hóstaði í mig bakverk. Undarlegt!

Öskuteppt

Eldsnemma í morgun skrækti gemsinn og mér var tjáð með smsi að það yrði ekkert flogið í dag. Næsta tékk 6.30 í fyrramálið! Þetta verður æsispennandi. Kate heldur því fram að þetta sé með ráðum gert. Mér verði ekkert sleppt suður. En ég verð að komast heim á morgun. Must. Annars er yndislegt að vera hér hjá Sjöfn og Mumma og barnabörnin þeirra skemma ekki félagsskapinn.

Egilsstaðir eru æði

Sat og horfði á hreindýrahjörð út um gluggann í hosilóinu hjá Sjöfn og Mumma í dag. Sól og blíða og unaðslega fallegt. Fórum og skoðuðum sýninguna í Sláturhúsinu. Verk eftir Kjuregej Alexöndru og nemendur - sum alveg stórkostleg. Uppi á lofti voru meðal annars föt eftir Ástu. Langaði næstum í þau öll. Labbitúr um plássið síðdegið. Þá var farið að kólna. Spennandi að vita hvort það verður flogið á morgun. Öskustopp í dag.

Rafmagnið

Sjöfn var að dásama rafkerfið hér eystra - sagði það væri orðið miklu stabilla og ef eitthvað gerðist væri hægt kippa því í liðinn í gegnum tölvuna. Við gleymdum að banka í borðið. Rafmagnið blikkaði - og bóndi hennar er núna á fullu út um allar sveitir að redda málunum. Hef ég svona áhrif kannski? Ekkert um þetta á fréttamiðlunum.

Allt að gerast

Allt að verða vitlaust - lítur út fyrir að ég sé á leiðinni austur þrátt fyrir allt. Kítlar mann svolítið þegar maður er "headhunted". Skrepp þangað um helgina og lít á aðstæður.
Pósturinn kom í dag með pappíra frá lækninum upp á sjúkraþjálfun, pantaði tíma og kemst að Gáska á mánudag. Svo fékk ég með sömu póstsendingu disk með holosync-hugleiðslu. Búin að hlusta. Virðist vera mjög gott.

Búkonulegt frænkukríli

 

Fékk ánægjuna af að fylgja frænkukrílinu á leikvöllinn á sumardaginn fyrsta. Hún undi sér þar lengi í sólskininu.

Mikill léttir

Þrekraunin ógurlega búin. Fékk góða hjálp við að klára skattskýrslurnar. Þetta er ekkert flókið þegar fólk veit hvað það er að gera. En næsta ár verður þetta ekkert mál trúi ég - þá verður það bara að ýta á send.

Gaman í vinnunni í dag. Fékk að skrá eitt einkaskjalasafn - mikið á norsku - það skemmir ekki.

Nýja hjólið

Vígði nýja hjólið í gær - fór 10 km - kom við miðja leið og fékk að smakka páskaegg og skoða gamlar myndir frá Ósló. Afskaplega vorum við ung og mjó :-). Fór líka í smáhjólatúr í dag en í hina áttina - upp brekkuna ógurlegu. Hjólið réði við brekkuna en mér keðjan fór af þegar ég reyndi að setja gír. Fljótlegt að redda því. Bara 2 km upp til Steina og Siggu svo túrinn var stuttur. Fékk kaffi og fiktaði aðeins í tölvunni. Skítkalt á leiðinni heim en fór samt í Elliðaárdalsvapp með Eddu á eftir. Allt í góðu nema skattskýrslur eru enn ófrágengnar. Fresturinn rennur út á morgun :(

MLIS

Dásamlegur dagur. Útskrifaðist með meistaragráðu í bókasafns- og upplýsingafræði í dag. Gaman á útskriftinni í Háskólabíó. Skemmtilegast reyndar þegar Háskólakórinn mætti ekki og einn kennaranna var settur í að leiða fjöldasöng! Frábærlega afgreitt af kynninum sem stjórnaði samkomunni og vakti kátínu í salnum. Fékk góða gesti í heimsókn, misjafnlega snjóbarða eftir að hafa brotist í gegnum ófærðina (sumir treystu sér ekki ...) Ég held ég eigi bestu fjölskyldu og vini sem hugsast getur. - Og það komast allavega fyrir 20 gestir í stofunni minni - hver skyldi hafa trúað því!

Góukaffi

Góukaffi hjá Gunna Bald í morgun. Hann gerir alltaf vel við konurnar sínar. Gaman að fara og hitta gamla vinnufélaga. Það er svo skrítið, þetta er eins og fjölskylduboð - maður sér fullt af fólk sem manni þykir vænt um en hefur ekki séð lengi.

Menningarhellingur

Skemmtilegir dagar. Er búin að lesa Enn er morgunn eftir Böðvar Guðmundsson. Athyglisverð bók sem gaman er að lesa. Áhugavert að lesa um þessa tíma í Reykjavík og Þýskalandi. Var á skemmtilegu námskeiði hjá Upplýsingu - um upplýsingalæsi. Lærði m.a. um samskiptafefinn Diigo. Góður að geyma vefbókamerki og allaveganna upplýsingar - og ég held frábær fyrir kennara. Og svo var talað mikið um One note "glósubókina". Kannski svolítið seint fyrir mig því ég er að útskrifast um næstu helgi. Var í gærkvöld í bókaklúbbi með Óslóarsystrum mínum og fór með Siggu í Þjóðleikhúsið í kvöld og sá Gerplu. Fínt - fínt leikhús fyrir augað. Sumar lausnirnar voru alveg dásamlegar. En leikritið hefði þurft lengri tíma og meiri textavinnslu.

Afmæli

Bloggið mitt raknað úr rotinu - í bili allavega. Flottur afmælisdagur þó ég hafi ekki fengið atvinnutilboð eins og ég óskaði mér í afmælisgjöf. Qi gong í hádeginu. Súpa og labbitúr með vinkonu. Bíó með annarri um kvöldið. Reyndar þurftum við að bíða í 57 mínútur eftir að myndin byrjaði, Percy Jackson og eldingaþjófurinn, það var einhver bilun. Myndin var varla biðarinnar virði - en endirinn bjargaði miklu (bláendinn). En rúsínan í pylsuendanum - og toppurinn á deginum voru norðurljósin sem skreyttu himininn á heimleiðinni. Algjörlega fullkomlega dásamleg.

Bara

Langt síðan ég skrifað e-a hérna. Lítið að frétta. Ritgerðin mjakast lúshægt áfram og það er gaman í vinnunni. Jólaskemmtun framundan og spurt hvort ég væri búin að finna til jólakjólinn! Hef ekki átt svoleiðs síðan ég var 10 ára. Ný áskorun altsvo.

Bókaþjófurinn

Lauk við að lesa Bókaþjófinn eftir Markus Zusak í dag. Heillandi bók. Mæli með henni.

Náttfatadagar

Leiðist - er með pest - skreið heim um hádegi í fyrradag og var hundlasin í sólarhring og svaf - en vantar núna e-a skemmtilegt að gera/lesa. Ætla að vera stilt og prúð um helgina og ná þessu alveg úr mér. Haus- og beinverkir horfnir og bara kvef eftir. Snöft.

Leti

Var allt of lengi í höfuðstaðnum í gær - og labbaði mig upp að öxlum (minnst). Byrjaði á að hvetja hlaupara og endaði á Borgarbókasafninu þar sem ég nældi mér í bók. Lá í leti í dag og las téða bók, Frelseren eftir Jo Nesbö, og hafði mikið gaman af. Nesbö skrifar góða krimma og ég fíla Oslóarkrimma. Verulegur aukabónus þegar maður þekkir staðhætti.

Sunnunammi

Sunnunammi – eða eiginlega Lovísunammi
80 gr. smjör
280 gr. marsmellows
5-6 bollar rice crispies

bræða saman smjör og marsmellows
hella rice crispies út í bráðina
hella á smjörpappír og dreifa úr
setja annan smjörpappír ofan á og eitthvað þungt til að pressa
skera svo í litla kubba þegar þetta hefur kólnað

Sunna says:
þetta er nammi

Helgarreisa norður

Gerði þrjár dásamlegar uppgötvanir um helgina. Grenivík, Safnasafnið og Baggalút "life" á Græna hattinum á Akureyri. Þetta í bland við góðar vinkonur er engu líkt. Fékk líka bónus á Baggalútinn. Megas tók nokkur lög með þeim.

Vinnan

Fyrsti dagurinn sem ég er alein í vinnunni - sat bara og las. Sem betur fer er lítið að gera í augnablikinu svo ég hef tíma til að setja mig inn í málin. Fólk fer að koma til vinnu eftir sumarfrí svo þetta breytist trúlega fljótt.

3. í vinnu

Þriðji í vinnu. Kuhlthau-heilkennið á fullu.

Púddur og jarðhræringar

Jarðaskjálftamælirinn í Kötukoti er greinilega mjög virkur. Ég fann ekki neitt en fannst ég sjá hreyfingu fyrir utan gluggann. Og svo tók ég eftir að olíulampinn sveiflaðist - lengi ... Kíkti á vef Veðurstofunnar í morgun og þar stóð
Mánudagur 13.07.2009 22:44:52 63,997 -20,982 1,8 km 0,3 38,02 6,6 km N af Selfossi. Ætli ég sé 6,6 km norður af Selfossi? :) Það gæti vel verið.
Er hér í púddupössun í nokkra daga. Haninn er ekki mjög reglusamur. Hann á það til að gala eina syrpu klukkan fjögur eða hálffimm en í gær vaknaði hann ekki fyrr en klukkan 8.10. Í morgun kom hann aftur á móti með tvær syrpur, fyrst fyrir 5 og svo aftur klukkan 7. Meina það - ætli maður ætti að kaupa vekjaraklukku handa honum?

Garðyrkja í morgunsárið

Fór með að keyra Rúnu frænku út á flugvöll eldsnemma í morgun, svona til að kveðja og halda mágkonu hennar selskap á bakaleiðinni. Dásamlegt skýjafar, tvöfaldur regnbogi og fallegir sólstafir. Og sjórinn spegilsléttur.
Fórum svo í kirkjugarðinn þar sem við plöntuðum á leiði mömmu og pabba blákvisti, bleikum blómum sem ég held heiti Cosmos og svo tóbakshornum. Búnar að því fyrir klukkan 8 og fórum svo í kaffi í bakarínu í Suðurveri. Svona eiga sunnudagar að byrja!

Ítalskur matur - mmmm

Æfingaprógram

Hef 20 daga til að koma mér gott form ...
Góðar hugmyndir einhver?

Daginn fyrir próf

Að læra er eins og að róa gegn straumnum,
þegar maður hættir því,
rekur mann til baka.
Gamalt kínverskt máltæki.

Gleðilegt sumar!

 

Besti staður í heimi

Skírdagur 2009

Bjössi minn

 

8. mars

Hér fyrir austan bara snjóar og snjóar og snjóar ennþá meira. Fór aðeins út að labba í morgun, vantar snjóþrúgur! Hvar er vorið eiginlega? En það verður að viðurkennast að hvítur snjór skreytir veröldina.
Ánægð hvað konum gekk vel í prófkjörum helgarinnar. Mikið væri gaman ef helmingur þingheims næst yrði duglegar, greindar og samhentar konur. Það er passleg ósk á alþjóðlegum baráttudegi kvenna.

kvart

Næstum búin að setja súrmjólk í kaffið. Reyndi að ræna kaffibolla mannsins fyrr í morgun. Er það nú furða að mér gangi brösulega með ritgerðina!

Bókaklúbburinnn

Fundur í bókaklúbbnum í gær. Mætti þó ég hefði bara lesið aðra bókina sem var Glerkastalinn og ég las hana um jólin. Hin bókin var Konur eftir Steinar Braga, mikið umtöluð bók og í útláni á öllum bókasöfnum sem ég hef aðgang að. Verð að viðurkenna að eftir að hafa hlustað á stöllur mínar í gærkvöldi að ég er bara feginn því að hafa ekki náð í bókina. Reyndar var það samdóma álit þeirra að bókin væri mjög vel skrifuð. En Glerkastalinn virðist vera hreinar gleðibókmenntir í samanburði við Konur.
Ég held áfram að ströggla við ritgerðarsmíð. Finnst ég alltaf vera að fara einhverja Krísuvíkurleið. Tók mér reyndar smá pásu frá skrifunum því bóndi minn heimsótti höfuðborgarsvæðið í nokkra daga og mér fannst skemmtilegra að sinna honum aðeins :)

Hálf gul sól og svolítið um ritgerð

Varla farin að skrifa staf en tókst samt að teikna einhverjar töflur í dag og pæla í hvað ég ætli að hafa i ritgerðinni. Kate segir það séu 55 dagar þar til við þurfum að skila. það þýði að framleiðslu upp á 2 síður á dag ... - þrjár ef ég dreg þetta eitthvað lengur. Hún er allavega byrjuð. En - úff. Sá góðan frasa á Fésbókinni áðan "It doesn't hurt to be optimistic. You can always cry later.”
Kláraði Hálf gul sól í gær. Var lengi að lesa hana. Ekki bók sem maður tætir í sig. Góð en svakalega erfið líka. Hálf gul sól var á fána Bíafra í frelsisbaráttu þeirra. Mæli hið sterkasta með bókinni.

Verkkvíði?

Einhver góð ráð um hvernig maður eigi að halda sér að vinnu, lesa fagbækur og vinna að ritgerð? Ég snýst bara í hringi og geri ekkert af viti.

Meiri bókalestur

Kláraði Dimmar rósir eftir Ólaf Gunnarsson í gærkvöld. Fann hana í Bókasafni Kópavogs þegar ég var að snudda þar um daginn og lét freistast því hún gerist á árinum 1969 til 1971. Ég veit eiginlega ekki hvað mér finnst um bókina. Held kannski að ég þurfi að melta hana.
En það var auðvelt fyrir mig að setja mig inn í tímabilið og muna eftir þrengslunum í stiganum í Glaumbæ, Las Vegas og Led Zeppelintónleikunum. Naut þeirra reyndar ekki því ég var með mígrene og varð að fara heim.

Yndislestur - ekki námsbækur!

Í fyrradag fór ég á bókakvöld með gömlum vinkonum. Við höfum ekki hittst í ár - held ég - en það á að breyta því aftur - stefnt að því að hittast einu sinni í mánuði fram á vor. Við röbbuðum bara létt um hvaða bækur við hefðum lesið upp á síðkastið og settum okkur fyrir hvað ætti að lesa fyrir næsta fund. Þetta var óskaplega gaman - reyndar fór seinni helmingur kvöldins í umræður um stjórnmál - það er erfitt að gleyma þeim málum þessa dagana.
En - ég kom heim með Lífstíð eftir Lizu Marklund og Myrká eftir Arnald. Veit ég má ekki vera að því að lesa skáldsögur en ætlaði bara rétt aðeins að líta á Lizu fyrir svefninn - og las til 3!. Hélt áfram þegar ég vaknaði og kláraði. Liza er skrambi skemmtileg - ég er viss um að Annika er með gríðarleg einhverfueinkenni. Svo ætlaði ég að vera rosadugleg að læra - en varð auðvitað að hlusta á blaðamannafund forsætisráðherra og varð svo brugðið að ég gat ekki fest hugann við skólabækur. Fékk mér þar með góða ástæðu til að lesa Arnald og glefsaði hann í mig. Endaði svo með að heimsækja vinahjón í gærkvöld, sat horfði á gamanmyndir með þeim og borðaði nammi.
Í dag druslaðist ég aðeins niður í Þjóðarbókhlöðu og svo á Austurvöll klukkan 3. Fínn fundur og skeleggir og flottir ræðumenn.

Klapparstígur 17

Einu sinni fyrir langalöngu átti ég heima á Klapparstíg 17, þar sem brann í nótt. Bjó uppi í risi í tveimur herbergjum með kærastanum mínum. Pabbi hans og mamma áttu heima á miðhæðinni. Þetta var gamalt hús. Ég var bæði draughrædd og eldhrædd í því. Var búin að hugsa upp hvernig ég ætti að komast út ef það kviknaði í. En tengdamamma sagði að það væru engir draugar þarna. Hún var - og er trúlega ennþá mjög næm. Ég trúði henni og vissi að brakið í stiganum væri bara að þrepin væru að taka sig eftir að ég hafði labbað upp. En samt - mér leið aldrei vel þarna ef ég var ein. Eigi að síður hefur mér alltaf þótt vænt um þetta hús og horfi ástúðlega á það þegar ég labba framhjá. Ég á góðar minningar um frumraunir í eldamennsku og pönnukökubakstur án mjólkur - en við áttum piparmyntulíkjör. Litlu systkini kærastans neituðu að borða pönnukökurnar því þær voru grænar. En þær smökkuðust ágætlega. Upp í risi voru afskaplega fallegir steyptir ofnar sem ekki var hægt að kveikja í lengur. Voru þarna bara sem skraut. Hef oft hugsað um að ef ég eignaðist einhverntíman hús þá vildi ég eiga svona ofna.

p.s. Kærastinn er að sjálfsögðu fyrrverandi og tengdamamman fyrrverandi tilvonandi og mér er stórlega létt því enginn dó í brunanum í nótt.

Góð heilsa

Fór á mjög áhugaverðan fyrirlestur hjá Matta Ósvald niðri í Maður lifandi áðan. Fyrirlesturinn nefnist "Góð heilsa er auðveldari en þú heldur" og fjallar m.a. um sýrustig líkamans eða PH gildið. Mæli með þessum fyrirlestri ef fólk hefur tækifæri. Kíkti aðeins í Þjóðarbókhlöðuna í dag og fór svo og hitti leiðbeinandann minn sem gaf mér góð ráð varðandi ritgerðina. Labbaði alla leiðina frá Háskólanum upp í Borgartún með viðkomu í banka í miðbænum og einni búð upp á Hlemmi. Yndislegt að rölta upp Laugaveginn í snjókomu. Það svoleiðis kyngdi niður að ég varð eins og snjókerling. Frábær dagur.

Síðbúin áramótaheit

Mynd af vef um íslenska þjóðbúninginn
Hvernig væri að gera áramótaheit eins og aðrir gera. Veit það er kominn 7. jan. en hva... aldrei of seint.
Klára upphlutinn sem ég byrjað á fyrir ... - æi - gleymum því. Á bara eftir sauma skyrtuna og ganga frá svuntunni og húfunni.
Klára ritgerðina mína fyrir 1. apríl.
Út að labba a.m.k. 20 mínútur á HVERJUM degi.
Þetta ætti nú allt að vera létt verk og löðurmannlegt. Hefst allt með réttu vinnulagi.

Glerkastalar og jólafrí

Síðasti dagur í jólafríi og skáldsögulestri. Í morgun hef ég lesið Glerkastalann eftir Jeannette Walls. Gríðarlega spennandi og skemmtileg ... sorgleg ... og allavegana bók. Fær 100% meðmæli.
Það er að byrja að rökkva hérna fyrir austan. Það hefur verið smá snjókoma í allan dag en virðist vera hlé í bili. Ætla að vappa upp í bókasafn og skila bókakostinum og kveðja þar. Jólunum er alveg að ljúka og þá tekur alvaran við.

Meiri bókalestur

Næ ekki að lesa allar bækurnar sem ég nældi mér í á bókasafninu. Þarf að skila þeim á miðvikudaginn. En í kvöld las ég Í spegli, í gátu eftir Jostein Gaarder. Hann er enn að pæla í tilverunni, lífinu og dauðanum. Falleg bók um stelpukrakka sem liggur fyrir dauðanum. Mæli með henni. Bjössi er á næturvakt og ég les og bakaði haframjölsmuffins sem ég set svo í frysti. (Fyrir utan þær sem ég át strax.)

Lesa, sofa, borða

Í fyrradag lauk ég víð að lesa Borða, biðja, elska. Var heilluð af fyrsta hlutanum um Ítalíu en hinir náðu mér ekki eins. Mæli samt með henni. Í dag kláraði ég svo að lesa Bláir skór og hamingja um hana Precious Ramotswe í Botswana. Hef ekki lesið þessar bækur í mörg ár. Gleypti í mig þessar fyrstu þegar ég uppgötvaði þær, fékk leið á þeim en þessi var fín. Það er líka gaman þegar maður finnur lykt þegar maður les bækur. Þá er greinilega verið að gera eitthvað rétt.
Við fórum í partý niður á Reyðarfjörð í gærkvöld og sváfum í bílnum í nótt. Þetta var sem sagt fyrsta útilega ársins og ég man ekki eftir annarri fyrr. Það var heitt og fínt í bílnum og við sváfum eins og ungar í hreiðri. Elduðum svo jólahangikjötið og borðuðum brot af því í kvöld. Afgangurinn fer í frysti og verður væntanleg álegg næsta hálfa árið.

Gleðilegt ár

og takk fyrir gamla árið. En mikið skelfing var þetta leiðinlegt skaup :(

Sólstafir og Lagafljótsormurinn

Appelsínustelpan

Fór í bókasafnið í dag og endurnýjaði skammtinn. Náði í m.a. í Appelsínustelpuna eftir Jostein Gaarder. Falleg ástarsaga og heimspekilegar vangaveltur eins og honum er einum lagið. Mæli með þessari bók. Samt er Kapalgátan ennþá uppáhaldsbókin mín eftir hann. Sá þegar ég var að leita að þessari bók á netinu um helgina að það sé búið að kvikmynda Appelsínustelpuna, hún verður frumsýnd í Noregi í febrúarlok. Mikið væri nú gaman að fá að sjá hana hérna líka.

Bókalestur

Í gær las ég Skuldadaga eftir Jökul Valsson og skemmti mér vel. Hann skrifar um dópdíler og ruglukoll á einstaklega skemmtilegan hátt. Í kynningunni segir að Matti sé hálflánlaus náungi. Ég verð nú bara að segja að hann sé ótrúlega heppinn.
Svo byrjaði ég aðeins á Nótt Úlfanna eftir Tom Egeland - hélt áfram í morgun og sleppti henni ekki fyrr en hún var búin. Hryllilega spennandi og skemmtileg. Heldur fullkomlega. Ég ætlaði út að labba á meðan það væri bjart. Kannski ég nái smáhring fyrst bókin er búin.

Hvíldardagur gyðinga

155 látnir eftir loftárásir á Gaza. Er ekki sabbat í Ísrael? Hvíldardagur gyðinga?

3. í jólum

Lögurinn er spegilsléttur og bleik ský spegla sig í honum. Ég ætla út í labbitúr í góða veðrinu. Bóndi minn sefur eftir næturvaktina. Búin að gera jólahreingerningu í tölvupóstinum - undarlegt hvað maður geymir - eða gleymir að henda.

Gleðileg jól

Jólatréð á planinu fyrir utan Mjólkurstöðina dansar magadans og bjölluómur heyrist frá Glitnishreindýrinu í glugganum. Ég er pakksödd og les Verði sáttmálans eftir Tom Egeland.

Tölfræði og skautasvell

Rok og rigning. Sá skauta í nytjamarkaðnum fyrr í dag - hefði átt að kaupa svoleiðis því skautar eru skynsamlegasti fótabúnaðurinn hérna í augnablikinu. Skruppum aðeins út í sveit eftir hádegið og á meðan við stoppuðum breyttist veðrið skyndilega og við þurftum að lúsast heim á glerhálum þjóðveginum. Æsispennandi og góð æfing fyrir magavöðvana.
Síðdegis kíkti ég inn á HÍ-póstinn minn og sá kveðju frá tölfræðikennaranum - sem sagði að einkunnir væru komnar inn á vefinn og enginn hefði fallið. Það lá við að ég færi tvöfalt flikkflakk afturábak af kæti. Og enn frekar eftir að ég komst inn á vefinn og sá ég var langt frá falli.

Vill einhver kaupa tölfræðibækur? :-):-):-):-):-):-):-)

Vetrarsólstöður

Það er svo fallegt að standa hérna í 7. himni og horfa yfir ljósum prýdda Egilsstaði og Fellabæinn. Snjór yfir öllu, jólatré bæði við mjólkurstöðina og annað lengra í burtu við kaupfélagið. En annars myrkur. Þetta er eins og útlent jólakort. Ég tími ekki að fara að sofa.

sjúkk!

Búin að skrifa síðustu skýrslu fyrir jól. Fékk 2 íslenskufræðinga að lesa yfir - önnur nýkomin úr prófarkarnámskeiði. Þannig að allt ætti að vera í lagi - nema kannski innihaldið ...
Er að taka til og fékk mér púrtvínsglas úr flösku sem lá undir skemmdum. :-) Hvissleis geng det hjá þér frænka?

Ólafía - þáttur á Rás 1

Árið 1976 var ég á leið eitthvað annað og stoppaði í Osló, ætlaði að vera í viku, en var eitthvað aðeins lengur eða 9 ár. En þarna fyrsta veturinn minn fór ég í menntaskóla, sumarhýran dugði stutt svo ég varð að finna mér vinnu og einhver mér vinveittur benti mér á kaffihús á Rodelökku sem vantaði aðstoð. Ég vann þar um veturinn 2 tíma daglega eftir skóla. Fóðraði nokkra kalla sem mest voru fastagestir með kaffi og aðallega brauði með spæleggi og karbonaði ef ég man rétt. Það var ekki fjölbreyttur matseðillinn en gekk alveg minnir mig. Allavega hélt það í mér lífi þann vetur. En það var ekki það sem ég ætlaði að tala um - heldur Mekki - kallinn sem átti kaffihúsið sagði við mig einn daginn þegar hann yfirgaf staðinn. Þegar þú kemur á morgun skaltu koma í gegnum garðinn og skoða styttuna sem er í honum miðjum. Ég spurði af hverju hún væri og hann bara glotti og sagði - farðu bara og gáðu að því.

Ég náttúrlega forvitin og fór og kíkti og varð furðu sleginn þegar ég fann styttu af peysufatakonu sem hét íslensku nafni og svo stóð eitthvað fallegt undir. Þegar ég kom í vinnunna sagði hann mér að þessi kona hefði verið engill í hverfinu þegar hann var barn og hefði gert ótrúlegustu hluti fyrir fátæka. Ég man ekki til að hafa nokkurntíman fyrr heyrt um Ólafíu Jóhannsdóttur. Mörgum árum seinna var ég á Kvinneforum í Ósló og dró nokkrar vinkonur mínar í garðinn og sýndi þeim Ólafíu. Þær þekktu hana heldur ekki. En núna er búið að skrifa um hana bók eða bækur og leikrit. Henni er gert hærra undir höfði. Styttan - eða brjóstmyndin af henni í HÍ er orðin sýnilege en styttan í Ósló var færð úr friðsæla garðinum við Helgesensgötu þar sem fáir sáu hana yfir á subbulegt torg sem dúfurnar skíta á hana.

Það var þáttur um Ólafíu á Rás 1 í kvöld - endurtekinn frá 2003. - Fínn þáttur - þess vegna komu þessar minningar upp.

Prentfrelsi

Er að vinna í eigindlegri aðferðafræði og rakst á þetta:

"... As the old saw has it, freedom of the press is reserved for the person who owns one."

Sitat frá Harry F. Wolcott: Writing Up Qualitative Research s. 64

Hann var nú reyndar bara að skrifa um hvernig maður ætti að skrifa en mér fannst þetta eiga vel við.

Járnkarlar og kerlingar

Tveir Kópavogsbúar voru að klára Ironman í Ástralíu. Hann var 11 klukkutíma og 41 mínútu og hún var 14 tíma og nokkrar sekúndur. Ég af fávisku minni hélt að þetta væri íþróttafrétt - en hún virðist ekki vera það af því að þau unnu ekki og þau voru ekki með neinn bolta. URR - en mikið rosalega finnst mér þau æðislega flott.
Í Ironman syndir maður fyrst 3,9 km - í sjónum -, svo hjólar maður 180 km og endar á því að hlaupa eitt maraþon... altsvo 42,2 km. Einhver til í að byrja að æfa ...?

Svæðisútvarpið lifir

Bravó - þeir hættu við að slátra svæðisútvarpinu! Jahérnahér - ég er svo hlessa - en mjög ánægð.

Það er ekki alveg öllum sama

Það eru öflugar RÚV-umræður á þessari bloggsíðu.

flottar myndir - fín tónlist

Bara rakst á þetta þegar ég var að skoða Flickr áðan - myndinar góðar og tónlistin skemmir ekki ...

Austurvöllur

Öflugur fundur á Austurvelli þó það væri skítkalt. Ég hugsaði með mér að við ættum að gera eins og mörgæsirnar - mynda þéttan hring og skipta svo reglulega út hverjir standa yst. Mér finnst skyldumæting - þó það taki þrjá til fjóra tíma frá próflestri - fyndið hvað allt tekur langan tíma.
Ræðumenn dagsins voru flottir, Stefán Jónsson leikstjóri, Kristín Tómasdóttir frístundaráðgjafi og Illugi Jökulsson rithöfundur. Tæpitungulaus og skelegg.
Mér datt í hug þegar ég var að hlusta á Illuga - bara á mínum vinnustað misstu 44 vinnuna - 21 fastráðinn og 23 verktakar - og ég geri ráð fyrir að það séu fleiri í raun. Því ég hugsa að ég sé ekki inn í þessari tölu. Ég var bara ráðin til áramóta og ég veit það er svoleiðis með fleiri. Samningarnir verða bara ekki endurnýjaðir. Ég hitti fyrrverandi vinnufélaga á Austurvelli - hann heldur líka að þessi tvö sem ég minntist á í gær hafi verið látin fjúka af því þau voru í kjaramálunum fyrir stéttarfélagið sitt. Það væri áhugavert að vita hvort stéttarfélög geta gert eitthvað í svoleiðis málum.
p.s. Gleymdi - það voru táknmálstúlkar á sviðinu á Austurvelli sem túlkuðu allt jafnóðum. Frábært framtak!

Í nettu sjokki

Gríðarlega erfiður dagur í vinnunni. Sá fyrst að Fréttablaðið spáði að 30 RÚV-urum yrði sagt upp - svo var ég kölluð inn og sagt að ég fengi ekki áframhaldandi vinnu eftir áramót sem er auðvitað slæmt - en kom svosem ekkert á óvart - ég var jú bara ráðin til áramóta.
En svo komu sjokkfréttirnar - 21 sagt upp og þar á meðal mörgum góðum og reyndum starfsmönnum. Þar á meðal var m.a starfsfólk sem hafði staðið í að semja um kjör fyrir sína starfsfélaga - en þau voru ekki trúnaðarmenn.

Viðskiptahugmynd?

Tíðnitöflur, mótmæli og kjallaraflóð

Gríðarlegt annríki í dag. Komin niður í Háskóla klukkan 10. Vann með Kate við tíðnitöflur og annað bráðskemmtilegt til 14.30. Skokkaði þá niður á Austurvöll. Þar var lúðarasveit, ættjarðarlög, mjög beitt og flott lögfræðinemastelpa sem hélt þrumurræðu og fékk alla með sér, Gerður, sem einu sinni var kennd við skemmtilegustu fatabúðina í bænum, kom með athyglisverða ræðu og sagnfræðinemi kláraði dæmið. Og Hörður býr til ramma utan um þetta allt. Alveg ótrúlegt - og ég var mest hissa á að það virtist vera fleira fólk núna en síðast.

Svo var Jón Sigurðsson hjúpaður bleikum klæðum og risaborði með IMF-skrímslið að gleypa Island hengdur upp á eitt húsið. Við erum alveg að ná þessu hvernig á að mótmæla held ég. Ánægð með það. Ég skundaði svo aftur upp í skóla til að klára verkefnið en einhver hluti skrapp upp á löggustöð til að mótmæla handtöku mótmælenda í gær.

Svo þar sem við vorum að klára verkefnið hringdi farsíminn minn sem yfirleitt er til friðs og mér var tilkynnt að það væri flóð í kjallaranum. Fnykurinn var ólýsanlegur þegar ég kom heim. Menn að dæla upp og allt á fullu. Fulltrúi frá Sjóvá mætti - það er húseigendatryggingin og innbústrygging hjá sumum - en við hin sem erum annarsstaðar þurfum að hafa meira fyrir hlutunum. Ekki komu þeir frá VÍS eða Verði. Urr! Sem betur fer var lítið á gólfinu í minni geymslu - en lyktin - jæks.

Gott útvarpsviðtal

Pétur Halldórsson á Akureyri talaði í morgun við Agnesi Sigurðardóttur á Árskógssandi sem startaði bruggverksmiðju þar. Aldeilis frábært viðtal. Mæli með því. Tengillinn er hérna og það er hægt að hlusta á þetta í hálfan mánuð. Hlusta strax og má líka hlusta aftur ef svartsýnin hellist yfir fólk - Mikið assgoti er þetta gott viðtal og dugleg stelpa. Já - og svo er bjórinn líka góður - er búin að smakka hann.

Statistikk og James Bond

Við bættum við 30 spurningalistum til að tölfræðiverkefnið verði marktækt(vonandi). Kate hefur staðið við bókasafnsdyrnar síðustu daga og kastað sér yfir alla sem hafa stungið þar inn nefi (held ég). Ég barði upplýsingarnar inn í tölvuna síðdegis og fór að því loknu á James Bond í Háskólabíói. Bondinn er kúl :-)

Koma svo

Klæða sig vel og koma á Austurvöll, og muna ullarsokkar, vetlingar, húfa og trefill í viðbót við allt hitt!

Ætli mótorhjóladella geti verið genetisk?

Hagfræði fyrir byrjendur

Þarna fékk ég senda dæmisögu sem var auðvelt að skilja :-)
Í þorpi einu birtist maður og kvaðst vilja kaupa apa af þorpsbúum á 1000 krónur stykkið. Þar sem mikið var um apa í nágrenni þorpsins fóru þorpsbúar að veiða apana og selja manninum þá. Maðurinn keypti þúsundir apa af þorpsbúum á 1000 krónur. Þegar framboðið fór að minnka bauðst maðurinn til að borga 2000 krónur fyrir apann. Aftur jókst framboðið um tíma, en síðan minnkaði það enn frekar og hætti loks alveg þar sem erfiðara var fyrir þorpsbúa að finna fleiri apa til að selja.

Maðurinn tilkynnti þá að hann mundi borga 5000 krónur fyrir hvern apa sem hann fengi, en hann þyrfti að skreppa frá í smá tíma og aðstoðarmaður hans mundi sjá um kaupin á meðan. Eftir að maðurinn var farin hóaði aðstoðarmaðurinn þorpsbúum saman og bauðst til að selja þeim apana, sem voru geymdir í búrum, á 3500 krónur stykkið. Fólkið gæti svo þegar maðurinn kæmi aftur selt honum apana á 5000 krónur. Þorpsbúar söfnuðu saman öllu sínu sparifé og keyptu apana af aðstoðarmanninum. Síðan hefur ekkert spurst til mannsins eða aðstoðarmannsins. Ofangreinda sögu fékk ég senda áðan. Eftir að hafa lesið hana skildi ég allt í einu betur íslenska bankakerfið og hlutabréfamarkaðinn.

Stærsta bókabúð í heimi á netinu

Google Signs a Deal to e-Publish Out-of-Print Books

Þetta kom í New York Times í morgun.

Fjölmenni á Austurvelli

Mótmælin á Austurvelli fóru að mestu leyti friðsamlega fram.
En vélhjólamenn eyddu eldsneyti fyrir fundinn og hjúpuðu Alþingishúsið með reyk.


Einhver læddist upp á þak á Alþingishúsi með Bónusfána

Fáninn blakti þarna í örfáar mínútur áður en þakglugginn opnaðist og sá guli hvarf
En þarna voru líka fluttar frábærar ræður, meðal annars benti Sigurbjörg Árnadóttir, sem er að upplifa kreppuna í annað sinn, okkur á að finnska leiðin er ekki til fyrirmyndar og Einar Már fór á kostum eins og venjulega.

Gamall sannleikur og nýr

Halldór Laxness lýsir íslenskum athafnamönnum í Kristnihaldi undir jökli.

Spurt er: Hvað er hraðfrystihús?
Og svarað: ?

Það eru íslensk fyrirtæki.
Spaugararnir reisa þau fyrir styrk frá ríkinu,
síðan fá þeir styrk af ríkinu til að reka þau,
þvínæst láta þeir ríkið borga allar skuldir
en verða seinast gjaldþrota og láta
ríkið bera gjaldþrotið.
Ef svo slysalega vill til að einhvern tíma kemur
eyrir í kassann þá fara þessir grínistar út að skemmta sér"

(Kristnihald undir Jökli, bls. 301)

Grazie Roberto!

Scudit, Scuola d'Italiano Roma
Held það sé ekki nokkur spurning hvert Íslendingar sem ætla að læra ítölsku fara. Kíkið á heimasíðuna. :-) Annars ætla ég bara að fara að brýna heykvíslina fyrir laugardaginn.

Islandsk sparegris

Þetta fékk ég í tölvupósti frá vinkonu minni í Noregi - hann er nokkuð ræfilslegur þessi sparigrís.

Hamingja og mótmæli

Happiness is nothing more than good health and a bad memory.
- Albert Schweitzer

Fór og labbaði niður frá Hlemmi niður á Austurvöll í góðum félagsskap. Það var meira fútt í mótmælunum í dag en síðasta laugardag en þó má bæta í betur. þarna talaði alveg fantagóður ræðumaður - sjúkraliði sem bar saman hvað það kostaði sem bráðvantar á spítalana og bruðlið í ríkisstjórninni. Vona að ræðan komi einhverstaðar sem aðrir geta skoðað hana.
Svo fór ég og kíkti á handverks- og hönnunarsýninguna í Ráðhúsinu. Fullt af fallegum og eigulegum hlutum. Ég mæli t.d. með trjánum hennar Láru og svo er skartið hennar Nadine alveg yndisleg.

bókasöfn og innanhússhönnun

þetta fann ég á útlenskri bloggsíðu sem fjallar mikið um bókasöfn. Marbendill hló og hugsaði um ákveðið bókasafn.

overhead at an unnamed library

A patron responds to the new carpeting:

“I can tell that a degree in librarianship does not involve interior design.”

Veruleikinn 1968?

Var að leita að grein í Mogganum frá nóvember 1968 þegar ég fann þessa mynd

Ísaldirnar koma og fara

Ég var að hlusta á dægurmálaútvarp Rásar 2 frá 1988. Fyrst frá 17. október það ár, þá var allt brjálað út af vísindahvalveiðum, því Grænfriðungar voru að bögga okkur og allir voru að hætta eða hættir að kaupa af okkur fisk í mótmælaskyni. Man ekkert hvernig það fór en það var greinilega gríðarleg kreppa í þjóðfélaginu. Svo fann ég upptöku frá borgarfundi frá 5. september trúi ég. Þá var allt brjálað - efnahagslífið í rúst, launahækkun sem lýðurinn átti að fá hafði verið fryst og gjaldeyrisforðinn í núlli. Mikið er gott að vera svona fljót að gleyma. En í alvöru - það mætti spila þessar upptökur aftur.

Mótmæli?

Íslendingar eru alveg einstaklega undarleg tegund. Þarna lufsumst við nokkur niður í bæ til að mótmæla - já meira að segja ég. Mætti niður á Austurvöll klukkan 15, þar var maður í pontu mjög sár yfir að einhver annar hefði auglýst mótmælagöngu klukkan 16. En það var sungið og Einar Már hélt þrusugóða ræðu og Guðmundur Gunnars aðra. Við mótmælendurnir stóðum þarna stillt og prúð og klöppuðum á viðeigandi stöðum. Svo var korters hlé - ég skrapp inn í Pennann og hnusaði af öllum bókunum sem mig langar að lesa og fór svo aftur út af Austurvöll og kom mér í gönguna og rölti upp að Ráðherrabústað. Það var líka afskaplega prúð ganga - reyndar var bara einhver bílstjóri með óspektir og flautaði óspart því hann komst ekkert áfram.

Við ráðherrabústaðinn var vænn hópur - m.a. svartir fánar og ég held einn rauður. Örstutt ræðuhöld og sum beittari en önnur og Arnþrúði Karlsdóttur tókst að koma smá lífi í fólki. Svo vöppuðum við bara heim sæl og glöð og þykjumst hafa verið úti og mótmælt. Ekki misskilja mig - ég mæli ekki með að við förum og brjótum glugga og hlöðum götuvígi. En ég meina - þetta er það tamdasta sem ég hef nokkurn tímann upplifað! Það heyrir enginn í okkur ef við höldum kjafti. Það er ekki nóg að bara klappa ef einhver segir eitthvað.

Reykjavík - Rotterdam

Ég fór á bíó áðan - Reykjavík - Rotterdam í Smárabíó - aldeilis frábær skemmtun. Efðist smá stund um val saumó á bíómynd því þetta leit skuggalega út á tímabili en þetta var frábært. Grafalvarleg skemmtileg hasarmynd. Þótti líka gaman að sjá uppáhaldsleikarana mína leika vonda lúða. En fyrir þá sem ætla í bíó er bent á að maður þarf ekki að mæta fyrr en 15 mínútum eftir auglýstan bíótíma. Reyna allavega að forðast auglýsingarnar á undan - þær eru hundleiðinlegar og spilaðar heyrnarskemmandi hátt.

fyllibyttuvörn á tölvupóst

Í þessari grein í NYT er sagt að það sé hægt að setja inn vörn á Gmail svo fólk skrifi ekki póst þegar það er drukkið. Það þyrfti trúlega að setja svoleiðis á fleiri staði ...

Tölfræði

Mig minnir að ég hafi einu sinni verið góð í stærðfræði. Geta svoleiðis hæfileikar glatast af notkunarleysi???

Draumfarir

Mig dreymdi í nótt að ég var að róa upp straumþunga á. Komst slatta upp með henni, undir brú en gafst upp og komst upp á bakkann hægra megin. Ætlaði að hvíla mig þar og taka svo annan áfanga seinna. Svo kom einhver framhaldsdraumur - þá var ég líka á kajaknum en á hraðri leið niður Hvítá, fyrir neðan Selfoss, í átt til sjávar. Hvort ætli þetta hafi með námið að gera eða fjármálin?

íslenskur húmor

Þetta fékk ég frá vinkonu minni í dag og finnst upplagt að deila með ykkur.

Kæru vinir
Á þessum síðustu og verstu tímum verðum við að gæta þess að tapa ekki
húmornum, þó að hlutabréfin séu töpuð...

An American said:

"We have George Bush, Stevie Wonder, Bob Hope and Johnny Cash."

The Icelander replied:
"We have Geir Haarde, no Wonder, no Hope and no Cash."

bankasöngurinn

Fréttir dagsins fullar af alvöruþunga - og það besta er að fólki er ráðlagt að leita til fjármálaráðgjafa!!!! Bíddu bíddu - hafa þeir ekki verið að gefa góð ráð?

En ef ykkur vantar eitthvað til að brosa yfir þá fann ég þetta á síðuninni hans Elíasar áðan og vill endilega fá ykkur til að gleðjast örlítið líka Fidelity Fiduciary Bank Sing Along. Vesgú - í boði Mary Poppins. Og hér er önnur útgáfa í boði Monty Python.

kostir þess að vera námsmaður

Einn af kostunum við að vera í skóla er að maður hefur ekki tíma til að hugsa um fjárhagslega þrengingar og fjármál landsins á heljarþröm. Mér finnst þetta bara áhugaverð læti þegar ég heyri eitthvað um þetta. Man reyndar mun verri tíma þegar ég átti ekki fyrir tannkremi og varð að nota sápu (oj!)og matur var af mjög skornum skammti. Vitna líka oft til orða listakonunnar - mig minnir það hafi verið Júlíana Sveinsdóttir sem sagði, þegar ríkir kallar í Danmörku voru að stúta sér því þeir höfðu tapað einhverju af aurunum sínum í bankahruni, "Nú er gott að vera blönk". Auðvitað er vont að tapa peningum en fj..... þetta eru bara peningar. Það hafa komið kreppur áður - þetta eru eins og ísaldir - þær líða hjá.
Annað merkilegt sem mér liggur á hjarta - ég er búin að vera sjónvarpslaus í rúmt ár. Er farin að vinna aftur á RÚV-inu - lenti í veislu í kvöld þar sem var mikið verið að tala um sjónvarpsefni - (gott innlendt sjónvarpsefni - því var hrósað upp í hástert) ... og ég kom alveg af hólsfjöllum - pínlegt. Kannski ég eigi að þiggja gamalt sjónvarp ...

Fyrsti snjórinn

Ég get svo svarið það - það kyngir niður snjó. Ég hló í morgun og vorkenndi Bjössa fyrir að vera fyrir austan þegar hannn sagði að það hefði allt verið hvítt úti þegar hann vaknaði ... en ég þurfti að skafa í fyrsta skipti í morgun og svo nú í kvöld byrjaði að snjóa - og snjóa - og snjóa. En snjórinn er farinn á Egilsstöðum og þar hafði hlýnað. Þetta verður áhugavert.
Ég fór jú á fyrirlestur fyrir ekki svo margt löngu þar sem því var haldið fram að það væri kuldaskeið í vændum og það brysti á fljótlega. Náunginn sagði 2011 eða 2012. BRRR. Það er eins gott að hingað kom í dag hersveit pípulagningamanna og þeir löguðu ofnakerfið í allri blokkinni svo her er nú hlýtt og notarlegt. En eins gott að ná í vetrarskó og trefla og húfur og búa sig undir að takast á við vetrarríkið með bros á vör.

Eitt verkefni frá

Loksins búin að ganga frá fyrsta viðtalinu í eigindlegum! Fólk er að tala um að þetta taki 8 tíma - átta tíma - kjaftæði. Kannski tekur það átta tíma að afrita viðtalið - svo þarf maður að skrifa allavegana hugleiðinga í kringum það ... Jæja - allavega er ég hætt núna og búin að prenta út 32! siður. Ætla út að labba einn hring - svo er það tölfræðin fyrir morgundaginn. Gaman að vera í skóla - ekki satt? (Jú annars - kosturinn er sá að maður gleymir að pæla í kreppu og bönkum og þjóðfélögum á heljarþröm)

afritun og ofurhetjur

Mikið er miklu auðveldara að afrita þetta ... viðtal þegar maður er búin að koma sér upp almennilegum græjum (Ástarþakkir Þorgerður snillingur) Annars hef ég ekki verið nógu dugleg að halda mér að verki - þarf að setja í gírinn á morgun - klára viðtalið og þýða tölfræðispurningarnar yfir á norsku ... Það er sko nóg að gera.
Svo er ég búin að eignast nýja hetju - einn ágætur Íslendingur afrekaði að hlaupa Spörtuofurþonið á 34 tímum. Er búin að vera að fylgjast blogginu hans í nokkurn tíma. Hann hljóp Laugaveginn í sumar en þótti ekki nóg og bætti við Fimmvörðuhálsi - svo hefur hann verið að dunda sér við hina ýmsu fjallvegi. Ég dáist að svona fólki - honum, Bibbu járnkerlingu og öðrum ofurhetjum. (Er einhver öfundartónn í þessu bloggi?)

vinna

Byrjaði að vinna aftur á mínum gamla vinnustað í gær. Reyndar á safninu. En bara 30%. Fann það í fyrrakvöld að mig hlakkaði til að mæta. Morguninn leið líka eins og örskot en ég er alveg út að aka - á ég að ýta á F2 - núna - eða F5 eða enter - og á ég að gera einu sinni eða tvisvar ... En þetta kemur allt. Og gamlir vinnufélagar fögnuðum mér vel. Svo yndislegt. En þetta tekur auðvitað tímann frá náminu. Mér tókst að ná inn 9 mínútum af viðtalinu í gærkvöld. Þá á ég eftir 32 ... YÆKS! Hvernig fer fólk að sem vinnur við svona!

Aðferðafræði

Búin að taka fyrsta viðtalið - hitti afskaplega viðræðugóða og elskulega konu. Búin að afrita heilar 8 mínútur og 12 sekúndur - það þýðir að ég á bara 41 mínútu eftir! Það er fínt að afrita það sem hún segir en mínar setningar eru hálfar og tafsandi. Hm - og svo segi ég dálítið mikið OK - Ingimundur frændi minn reyndi mikið að venja mig af þessu þegar var í sveit hjá honum þegar ég var svona 10 og 11 ára. Man ég reyndi - kannski ég ætti að reyna betur núna :)

Bílastúss og Herba

Þarf að fara á morgun og kaupa bremsuklossa á bílinn minn og eitthvað járndót sem á að vera í nágrenni við bremsuklossana. Mér finnst að bílar ættu að vera viðhaldsfríir. En ég er samt heppinn að eiga góðan nágranna sem hefur gaman að því að klappa bílum. Gott þegar sá laghenti er langt í burtu, ekki mundi ég treysta mér í svona framkvæmdir.
Var á flottri Sportstefnu í Háskólabíói í dag - á vegum Herbalife. Þar var m.a. kynntur nýr sportdrykkur og fólk talaði um hvað Herba væri gott í allaveganna íþróttum. Ég vissi það nú reyndar - en mér fannst vanta besta vitnisburðinn. Gunnlaugur Júlíusson hljóp Laugaveginn í sumar - þótti víst ekki nóg og hljóp áfram Fimmvörðuhálsinn og þakkaði Herbasjeiknum fyrir jafna og góða orku. Það fannst mér sko meðmæli.

Haustlægðin

Haustlægðin er brjáluð fyrir utan gluggann minn. Aspirnar eru í fimleikum og reynitrén líka. Labbaði heim í gegnum dalinn síðdegis og varð blaut inn að skinni. Kópavogslækurinn þóttist vera fljót. Sem betur fer hafði ég haft vit á að setja plastpoka inn í bakpokann. Annars ætti ég trúlega mjög blautar skólabækur. Remdist í kvöld við að skrifa rannsóknaráætlun fyrir eigindlegar. Veit ekkert hvað ég er að gera. Gaman að því. Kannski ég viti meira um jól.